【正向管教】心理文章分享

功課的先後次序 從一次家人的聚餐聽到有親朋戚友說每天教導孩子做功課的時刻實在非常難捱，囝囝經常哭鬧或以不舒服為藉口，媽媽形容做功課就好像「打仗」般，累鬥累，要哄要陪，有時候甚至需要罰。媽媽傷透腦筋，無論怎樣也不能令他乖乖自律做功課。我從旁細聽才發現原來媽媽有要求囝囝做功課的次序，先是他最討厭的數學 ( 媽媽認為先要把最難的解決 ) ，然後英文，最後才讓他做喜愛的中文 … 各位家長認為，什麼原因令到囝囝很討厭做功課？ A) 一開始便面對最難最討厭的科目，學習動機及信心已經很低 B) 媽媽指導囝囝做功課時常板起口面或眉頭心鎖，令孩子很抗拒 C) 囝囝認為自己沒有能力完成這麼大的功課量 以上皆是令到囝囝對做功課感到抗拒的原因。首先，孩子放學後已感到很疲累，做功課還要先面對自己最討厭的科目，當中的學習動力便會大大下降，亦不免會有「我都唔識做，點解要做」「好悶，冇與趣」等想法。其次，媽媽指導孩子時的態度亦大大影響囝囝做功課的動力，試想想，一方面，他在學校已經被要求溫書，測驗考試。回到家最親的人也是用老師於學校權威性的教育方式，這樣不但令到孩子感到焦慮，更有壓迫的感覺。另一方面，當孩子察覺到父母的神情嚴肅或會有內疚感，「係咪我唔識做，好蠢，媽咪先會咁惡咁嬲」「我咁樣媽咪係咪唔愛我喇 .. 」隨即感到很內疚，很討厭自己「蠢」，誤以為父母的愛是建基於他的成績，更會影響他的能力感。最後，面對龐大的功課量，孩子不免感到無能為力，不相信自己能夠完成。 而做功課的次序是真的重要嗎？需要嗎？我們明白家長或老師安排先後次序的需要，因為可以陪伴著他們去解決難的功課，能夠節省時間。但是孩子更需要的是學懂如何規劃自己的時間及安排事情的重要性。如果孩子能夠從做功課學起，由自己去決定先完成什麼，不但會提升他們的自主感，更會影響其自我價值，相信自己是有能力的。 以上述例子為例，媽媽可以先了解囝囝對於數學感到抗拒的原因，聆聽他的需要，承認他的感受，讓他感到「被明白」，再陪伴他慢慢教導他可以怎樣面對，一直催迫他快點完成只會令他感到氣餒無力。此外，如果囝囝能夠自己決定功課的次序，先完成他喜愛的中文，有興趣自然便令到他的學習動機增加。當他能夠完成時，能力感亦會隨之提升，而面對之後的難題亦不會如此卻步。 不要讓你的孩子

選擇性的「緘默 」？ 「我個仔喺屋企好肯講野咖」 「點解出街唔肯開口 明明佢識講」 「佢喺出面淨係會郁手郁腳 唔會用把口表達」 「我已經比咗好多錢佢做言語治療」 以上對話都曾經從被診斷有言語障礙或言語發展遲緩孩子家長的口中聽過。當然，言語障礙會影響小朋友說話能力，例如發音、流暢度、聲線問題等。可是言語障礙並非影響小朋友願不願意開口說話的單一原因，意指他們對人開口說話的願意度。曾有位家長(孩子正讀K2)向我呻:「佢喺屋企好似機關槍咁講嘢，出到街就聲都唔出，死都唔肯開口表達，真係令我好煩！佢明明識講咖！」 咩原因識講野又唔願意講？初初見呢位小朋友A既時候，佢都係一句嘢都唔肯講。媽媽話小朋友有嚴重嘅發音問題，好多時候要靠估，仲要估好多次先知佢講咩，有時小朋友A自己都會講到好忟。細問後先知道朋輩，如同學和公園嘅小朋友會成日笑佢講野唔正，學校老師都冇咩耐性估佢講咩。常被嘲笑和不被用心聆聽令到佢同外界講野既信心同意願愈來愈低。 有一次喺中心見到其他小朋友笑A講嘢唔正，「咩話？你講咩呀？」，然後連環說一堆話嘲笑他，A隨即低頭扁咀，媽媽則在旁看著。當時，我鼓勵她走過去，嘗試幫仔仔向小朋友解釋「佢因爲仲學緊發音，所以講嘢未係好正」去停止小朋友嘅嘲笑，然後嘗試鼓勵佢再講多次「唔緊要咖，你慢慢講，我會專心聽」等說話， A隨即勇敢慢慢講多次，小朋友亦停止嘲笑他。 呢句簡單說話像是告訴他：「我接納你，我會用心聆聽」。咁樣可以增強仔仔講野嘅信心，而我亦鼓勵媽媽在家長多教仔仔如何回應別人的嘲笑。雖然家長唔能夠隨時隨地幫助/ 安慰小朋友， 我們亦不適宜過度干預小朋友既社交時刻，但適當介入可以令小朋友覺得被保護，能增強佢地去面對社交場景嘅信心。 Blog Sponser:   APPHK   ( http://apphk.org )

安全感對小孩有多重要? 昨天在小學帶完輔導小組後，在學校門口看到其中一位組員皺著眉地撥電話。 👦🏻：「姑娘，我打左3次都未搵到媽咪，平時佢一次就聽，我好驚呀，佢會唔會有事咖？」 👩🏻當我未來得及回應時，他拿著電話說：「媽咪，你唔聽電話既？哦，你同嬸嬸去左行街，嚇死我啦，我係門口企喺道等你喇。」 收線後，組員立即開心地笑著說：「我搵到媽咪啦！」 看到這個情景，我的腦海立即浮現小學階段媽媽常夜歸不接電話的經歷。她是個售貨員，工作時間1-11pm， 放工後常與朋友同事去飲杯酒🥂🍺放鬆一下。 記得每晚11時，我會拿起電話☎媽媽，追問她會否現在回家，每當媽媽要出街時便會告訴我「我好快返唻咖啦，你訓啦乖女唔洗等我。」由於我非常想念媽媽，即使很累亦會盡力撐到她回家。時間一分一秒的過去，當等了很久仍未見媽媽的蹤影時，我便會拿起電話「奪命追魂call」。雖然每次媽媽夜歸也不會接聽電話，但我仍會鍥而不捨地邊哭邊打，昐望聽到她的聲音，但絕大部分時間都是響到電話飛去call台為止，再不停地留言(當時還未有錄製的留言信箱)。 我 :「唔該姐姐電話9XXX-0XXX，同佢講佢細女等緊佢返屋企。」記得有次call台姐姐不耐煩地說: 「小朋友，你留左好多次言啦，你嘅信息send咗去媽媽call機咖啦，佢知道你搵佢咖啦，唔駛再打唻啦。」 找不到媽媽，又不敢再打電話，當時可以做的只是無力地繼續哭泣，心想: 「媽咪係咪有事? 係咪飲醉酒唔識返屋企? 佢會唔會唔返黎? 佢係咪會唔要我? 」有時哭得太累睡著了，睡醒便立即跑到媽媽房，當看到她在房睡覺就非常安心。如果凌晨時分等到媽媽回家，我便會收起眼淚笑著抱實媽媽，跟她說幾句話便能安心睡覺。 在孩子的眼中，父母就是他們的世界，他們的所有。因此，當孩子找不到父母時，他們定必會感到非常不安，小腦袋隨即會浮起不同的負面想法，有著各式各樣的擔心和害怕。當然，父母也有工作也有生活，同時孩子都要上學，黏著24小時是絕不可能的事。然而，作為父母，你們在外出時，能否預先告知孩子大約歸家的時間，在孩子致電時嘗試安撫他們的不安情緒，然後盡力遵守約定回家的時間來讓孩子安心? 當然，最重要的還是多陪伴孩子、多與他們溝通，多向孩子表達其重視和關顧等都來幫助其建立安全

千萬別小看遊戲的重要性 近日接見了一位初小學生的媽媽，媽媽說兒子與她的關係惡劣，學業成績差、不願意做功課溫習、自信心差、不渴望出街，只希望留在家中玩貓，她很想透過遊戲治療去幫助孩子的成績進步。 細問之下，家長非常緊張兒子的學業成績和前途，因此集中火力催谷他。兒子每天的時間表都被媽媽排得密密麻麻 :  每天放學便要補習，補習後便由工人姐姐督促他做課外練習，待媽媽回家後便繼續跟他溫習。週末也是由早學習到夜晚。由於爸媽的生意繁忙，他們很少跟他玩或溝通學業以外的話題，更別說一起外出食飯或親子日。 「佢完全冇遊戲時間 ?  屋企有冇玩具咖 ? 」   心理學家問 「邊有時間玩 ? 佢每日都唔肯做功課，我地又好忙，屋企冇咩玩具咖」媽媽答 「有時都會帶佢出去玩嘅，我每次去都會同佢講，我帶你去玩，你就要更加比心機讀書，同埋講定會比練習佢之後做。但好奇怪，佢會話唔去玩，佢係一個唔鍾意玩嘅小朋友，我都冇哂辦法。」媽媽繼續說 「媽媽，你都曾經打過工，試諗下如果老闆帶你地出去食好野，然後同你講，我帶你出去食好野，你要更加比心機做野唔好辜負我 ;  老闆再講定你地知番到公司會有額外工作，你仲會唔會想去 ? 」 心理學家回應後，媽媽立即點頭說明白了。 然後，心理學家問了媽媽一個問題 「你覺得你個小朋友一世人最需要擁有咩 ? 」 「我諗係開心，有自信，」媽媽答 「你覺得你而家嘅教養方法係教緊佢成為開心、有自信嘅小朋友 ? 」心理學家問 聯合國把遊戲視為全世界兒童不可或缺的權利，其實，玩是非常自發的行為。除了孩子，我相信家長們都喜歡玩、享受玩樂時間，不是嗎 ? 兒童的遊戲不只是娛樂消遣、它還充滿了意義和重要性，對小朋友是非常重要的。在遊戲過程，孩子可以 :  發洩精力、學習負起生活責任、達成困難的目標、釋放感受、發洩競爭的需求、以可被接受的方式表達攻擊性   、表達想法和感受、探索關係、理解自身關係、揭露心中的願望及感到掌控，有安全感等等。 尤其重要的是，由於孩子的語言和認知發展過程仍在進行中，他們未有足夠的口語能力來表達內在感受和表達感受的強度。遊戲其中一個重要的功能便是幫